Քննարկվել են ներդրումային նոր ծրագրեր

«Երևանը և Սանկտ Պետերբուրգը ընդլայնում են համագործակցության հորիզոնները» խորագրով համաժողովի շրջանակում համագործակցության մի շարք ուղղություններով գործակցային կապերն էլ ավելի ակտիվացնելու նպատակով կազմակերպվել են կլոր սեղան-քննարկումներ:
«Առևտրատնտեսական համագործակցություն. փոխադարձ ինտեգրում» խորագրով  ընթացող քննարկմանը մասնակցել են քաղաքապետարանի աշխատակազմի զարգացման և ներդրումային ծրագրերի վարչության պետ Արմեն Հարությունյանը, Երևանի և Սանկտ Պետերբուրգի առևտրաարդյունաբերական պալատների, ինչպես նաև Սանկտ Պետերբուրգի արդյունաբերական քաղաքականության և նորարարության կոմիտեի նախագահները, միջազգային կազմակերպությունների, տեղական և պետերբուրգյան ավելի քան 50 ձեռնարկությունների ներկայացուցիչներ: Ներկայացվել են Հայաստանի ԵՏՄ անդամակցության շրջանակում երկու քաղաքների միջև առևտրատնտեսական համագործակցության ընդլայնման հնարավորությունները քաղաքային ենթակառուցվածքների, մասնավորապես արտադրական, արդյունաբերության, առևտրային, էներգետիկայի և հեռահաղորդակցության ոլորտներում:

Ներկայացնելով Երևանում կարճաժամկետ և երկարաժամկետ ներդրումային ծրագրերի իրականացման հնարավորություններն ու այդ ուղղությամբ քաղաքային իշխանության դիրքրոշումը՝ Արմեն Հարությունյանը նշել է, որ երկկողմ  գործարար կապերի ամրապնդումն, անշուշտ, կնպաստի գործակցության ընդլայնմանը:

«Ձևավորված բարենպաստ ներդրումային դաշտը մայրաքաղաքում հեռանկարային է: Քաղաքապետարանն իր հերթին և իր լիազորությունների շրջանակում հնարավորին աջակցում է նմանատիպ ծրագրերի իրականացմանը, ինչը կարևոր հանգամանք է ներդրողների ներգրավման համար: Սա քաղաքապետ Տարոն Մարգարյանի որդեգրած սկզբունքն է:  Ակնկալում ենք, որ այս հանդիպման ավարտին փոխշահավետ համագործակցության նոր  օրինակներ կունենանք»,-նշել է Արմեն Հարությունյանը:

Սանկտ Պետերբուրգի արդյունաբերական քաղաքականության և նորարարության կոմիտեի նախագահ Մաքսիմ Մեյկսինը նշել է, որ, հաշվի առնելով առկա նախադրյալները, իրենք շահագրգռված են Երևանի հետ փոխգործակցության ակտիվացմամբ:

Որոշ ծրագրերի շուրջ  առավել մանրամասն քննարկումներ անցկացնելու և առավել կոնկրետ քայլերի ձեռնարկման նպատակով անցկացվել են առանձին հանդիպումներ:

Երևանի և Սանկտ Պետերբուրգի միջև 2015-2020թթ. համագործակցության ծրագրի շրջանակում Երևանի առևտրաարդյունաբերական պալատի և «Սանկտ Պետերբուրգի միջտարածաշրջանային  գործարար-տեղեկատվական կենտրոն» ձեռնարկատիրության զարգացման աջակցության ասոցիացիայի միջև ստորագրվել է փոխգործակցության համաձայնագիր:

Երևանի քաղաքապետարանի տեղեկատվության
և հասարակայնության հետ կապերի վարչություն