Հանձնաժողովը դրական եզրակացություն է տվել ՀՀ հարկային օրենսգրքում լրացումներ նախատեսող օրինագծին

Հոկտեմբերի 21-ին ՀՀ ԱԺ ֆինանսավարկային եւ բյուջետային հարցերի մշտական հանձնաժողովն Արկադի Խաչատրյանի նախագահությամբ գումարել է արտահերթ նիստ:

ՀՀ ֆինանսների նախարարի տեղակալ Արման Պողոսյանի ներկայացմամբ երկրորդ ընթերցմամբ քննարկվել եւ դրական եզրակացություն է ստացել ՀՀ կառավարության հեղինակած «ՀՀ հարկային օրենսգրքում լրացումներ կատարելու մասին» օրինագիծը:

Հիմնական զեկուցողի տեղեկացմամբ՝ առաջինից երկրորդ ընթերցում նախաձեռնության վերաբերյալ գրավոր առաջարկ է ներկայացրել ՀՀ ԱԺ «Բարգավաճ Հայաստան» խմբակցությունը, որը չի ընդունվել:

Հանձնաժողովի նախագահ Արկադի Խաչատրյանը, ողջունելով նախաձեռնությունը, նշել է, որ այն ունի սոցիալական կարեւոր նշանակություն:

Հիշեցնենք, որ նախագծով առեւտրային բանկերը եւ վարկային կազմակերպություններն առանց լրացուցիչ հարկային պարտավորություններ կրելու կներեն ռազմական գործողությունների հետեւանքով զոհված, անհետ կորած կամ հաշմանդամ դարձած վարկառու ֆիզիկական անձանց եւ նրանց հետ փոխկապակցված անձանց որոշակի շրջանակի վարկային պարտավորությունները: Փոխկապակցված անձինք կարող են համարվել համատեղ ապրող ծնողները, ամուսինը եւ համատեղությամբ ապրող զավակները: Կարգավորումը վերաբերելու է ոչ միայն տույժերին ու տուգանքներին, այլ նաեւ՝ վարկերի մայր գումարներին: Կառավարությունն առաջարկում է, որ վերոնշյալ կարգավորումը գործի նաեւ անհատ ձեռնարկատերերի եւ նոտարների դեպքում:

parliament.am