ՀՀ ԱԺ ֆինանսավարկային եւ բյուջետային հարցերի մշտական հանձնաժողովի արտահերթ նիստում

Մարտի 30-ին ՀՀ ԱԺ ֆինանսավարկային եւ բյուջետային հարցերի մշտական հանձնաժողովը Մանե Թանդիլյանի նախագահությամբ գումարել է արտահերթ նիստ:

ՀՀ տարածքային կառավարման եւ ենթակառուցվածքների նախարարի տեղակալ Վաչե Տերտերյանի ներկայացմամբ պատգամավորները քննարկել են ՀՀ կառավարության հեղինակած «Հայաստանի Հանրապետության ու Վերակառուցման եւ զարգացման միջազգային բանկի միջեւ «Կենսական նշանակության ճանապարհային ցանցի բարելավման ծրագրի երկրորդ լրացուցիչ ֆինանսավորում» վարկային համաձայնագիրը վավերացնելու մասին» նախագիծը:Հիմնական զեկուցողի տեղեկացմամբ` ծրագիրը ներկայում գործող «Կենսական նշանակության ճանապարհային ցանցի բարելավման» եւ «Կենսական նշանակության ճանապարհային ցանցի բարելավման ծրագրի լրացուցիչ ֆինանսավորում» ծրագրերի շարունակությունն է:

Փաստաթղթով նախատեսվում է, որ ՎԶՄԲ-ն ՀՀ-ին կտրամադրի 13,400,000 եվրո գումարի չափով վարկ` 25.5 տարի մարման ժամկետով, որից արտոնյալ ժամկետը` 14.5 տարի: Ծրագրով նախատեսվում է կենսական նշանակություն ունեցող ճանապարհների բարելավում, ծրագրի կառավարում եւ ինստիտուցիոնալ ուժեղացում, ինչպես նաեւ միջոցներ արտակարգ իրավիճակներում արձագանքելու համար:

Պատգամավորները դեմ են եղել, որ նմանատիպ համաձայնագրերը քննարկվեն հրատապ ռեժիմով:

Վաչե Տերտերյանին հարցեր տալու փուլում հանձնաժողովի անդամ Վարդան Աթաբեկյանն առաջարկել է զեկուցողին հետաձգել հարցի քննարկումը: Կառավարության ներկայացուցիչն ընդունել է առաջարկը:

parliament.am