Երևանում շինարարական ակտիվությունը կարող է 2024 թվականին նվազել, իսկ հետո ակտիվանալ մարզերում, բայց ոչ ամենուր, քանի որ կարող է առաջանալ առանձին տարածքներում կառուցապատողների համար ընդունելի գներով բնակարանները վաճառելու խնդիր։ Այս մասին NEWS.am -ի թղթակցի հետ զրույցում ասաց Հայաստանի գործատուների հանրապետական միության նախագահ Գագիկ Մակարյանը։
Նա նշեց, որ եթե շինարարության ոլորտում ակտիվությունը նվազի, ապա անկում կլինի նաև շինանյութի արտադրության և իրացման ոլորտում։
«Անկում կլինի նաև պահածոների արդյունաբերության մեջ, եթե նորամուծություններ չներդրվեն և չհայտնվեն նոր տեսակի ապրանքներ։
Այդ ապրանքների արտահանումը հիմնականում ուղղվում է Ռուսաստան, որը սահմանափակված է Վերին Լարսի անցակետն անցնելու հետ կապված խնդիրներով։ Բացի այդ, չաշխատեցին ծովային փոխադրումները ։ Դրան գումարվում է նաև Թուրքիայի գործոնը, որը մատակարարումներ է իրականացրել դեպի Ռուսաստան, ինչը կարող է խնդիրներ ստեղծել գնային սեգմենտում մրցակցության առումով»,- հավելեց փորձագետը։
Նրա խոսքով, անկում կարող է լինել նաև կոնյակի արտադրության ոլորտում, և դա պայմանավորված է նրանով, որ Ռուսաստան ներկրվող կոնյակը թանկարժեք խմիչք է, իսկ ռուսների սոցիալական վիճակը վատթարանում է Ուկրաինայում տեղի ունեցող իրադարձությունների ֆոնին, ինչը կարող է ազդել պահանջարկի վրա.
«Ինչ վերաբերում է զբոսաշրջության ոլորտին, ապա դա կախված է Ուկրաինայի իրադարձություններից՝ ինչպես կավարտվի հակամարտությունը, կվերացվեն արդյոք Ռուսաստանի դեմ պատժամիջոցները և այլն։ Շատ բան կախված է ռուսների վճարունակությունից՝ հաշվի առնելով Հայաստանում ծառայությունների գների բարձրացումը։ Վրաստանում, օրինակ, ռեստորաններում, սրճարաններում, հյուրանոցներում գները համեմատաբար ցածր են»,- ընդգծեց Մակարյանը։
Նա հիշեցրեց, որ փոքր բիզնեսը զարգանում է հենց զբոսաշրջության ոլորտի աճով, քանի որ ծառայությունները հիմնականում ուղղված են զբոսաշրջիկներին, ուստի ակտիվությունը կարող է նվազել նաև փոքր բիզնեսում։
«Ընդհանրապես փոքր բիզնեսի հնարավորությունները կապված են խոշոր բիզնեսի հետ, ուստի վերջինիս զարգացումն այս տեսանկյունից կարեւոր է։ Արդիականացումը և խոշոր բիզնեսում ներդրումները նպաստում են փոքր բիզնեսի ակտիվությանը, որտեղից խոշոր բիզնեսը սովորաբար գնում է ծառայություններ և ապրանքներ»,- ասաց փորձագետը։
Նա կանխատեսում է փոքր ձեռնարկությունների թվի հետագա աճ՝ ռուս վերաբնակիչների, արցախահայերի, հնդիկների առկայության ֆոնին։
«Սակայն փոքր բիզնեսը ներքին սահմանափակ պահանջարկի պայմաններում կարող է խնդիրներ ունենալ զբոսաշրջության ոլորտում ռեցեսիայի կամ խոշոր բիզնեսի պատվերների կրճատման դեպքում»,- ընդգծեց Մակարյանը։
Նա մատնանշեց Հայաստանի տնտեսության անփոփոխ կառուցվածքի խնդիրը, որը հիմնված է ալկոհոլային խմիչքների արտադրության, հանքարդյունաբերության, պահածոների և տեքստիլի արտադրության վրա։
«Հիմնականում միայն այս ուղղություններն են ապահովում արդյունաբերական արտադրանքի ծավալները, ինչպես նաև արտահանման ծավալները, մինչդեռ այլ ոլորտներում փոփոխություններ չկան։ Առկա խնդիրները լուծելու համար կարեւոր է նաեւ աշխատել վաճառքի շուկաների դիվերսիֆիկացման վրա»,- եզրափակեց փորձագետը։
Արամ Դանիելյան
news.am
| Անուն* | |
| Ձեր էլ. հասցեն* | |
| Ուղարկվող էլ. հասցեն* | |
Комментарии
нет комментариев
Написать комментарий
Комментарии может оставить только зарегистрированный пользователь.Вам необходимо авторизоваться или зарегистрироваться