Հայկական ավիաընկերությունները ամռանը աուդիտ կանցնեն՝ դեպի ԵՄ թռիչքները վերսկսելու համար. Գնել Սանոսյան

Հայկական ավիաընկերությունների նկատմամբ ԵՄ–ի կիրառած արգելքը ծանր հարված էր այդ ոլորտի համար։ Այս մասին, այսօր՝ մայիսի 30-ին, ԱԺ–ում 2022թ–ի բյուջեի կատարողականի քննարկման ժամանակ ասաց ՏԿԵ նախարար Գնել Սանոսյանը` հավելելով, որ Հայաստանը հույս ունի առաջիկա ամիսներին շտկել իրավիճակը։

«Ամռանը հայկական ավիաընկերություններին կենթարկվի աուդիտ՝ դեպի ԵՄ երկրներ թռիչքները վերսկսելու համար։ Սա մեծ հարված էր ավիաընկերություններին, սակայն նրանք աշխատում են վերաբացել եվրոպական երկինքը»,-ասաց Սանոսյանը:

«Եթե պարզ ասեմ` շուրջ 41 պրոցես է պետք անել, որ այդ դաշտից դորս գանք։ Դրանց կեսից ավելին` 22-23-ը, արդեն արվել է։ Մյուսներն ընթացքի մեջ են։ Այս տարի ամռանը մեզ մեծ փորձություն է սպասվում։ Գործընկերները, որոնք անընդհատ հատևում են, թե մենք այս ուղղությամբ ինչ աշխատանք ենք տանում, իրենք այստեղ ներկայացուցիչներ ունեն, մեր ավիացիայի հետ աշխատում են, նաև այլ խումբ կգա, և մեր ընկերություններն աուդիտի կենթարկվեն։ Եթե մեր ընկերություններն այդ աուդիտը կանցնեն, դա կլինի բոլորիս ձեռքբերումը, որովհետև դրան կհաջորդի այդ ընկերությունների համար դեպի Եվրոպա ուղղությունները բացելը»,– պարզաբանեց նախարարը:

Նրա խոսքով, այս ամառ՝ երկու ամսվա ընթացքում, մեր եվրոպացի գործընկերները աուդիտ կանցկացնեն, եթե մեր ընկերությունները հաջողությամբ անցնեն այն, նրանք կկարողանան թռչել Եվրոպա»,- հավելեց Սանոսյանը։

Նշենք, որ այժմ հայկական ավիաընկերությունները դեպի Եվրոպա թռիչքներ կարող են իրականացնել միայն «թաց վարձակալությամբ» վերցված ինքնաթիռներով (օտարերկրյա անձնակազմով, տեխնիկական սպասարկումով և ապահովագրությամբ - խմբ.): Եթե աուդիտը հաջողությամբ անցնի, ընկերությունները կստանան TCO (երրորդ երկրի օպերատոր) վկայականներ, որոնք թույլ կտան ինքնուրույն թռչել։

«Հիշեցնենք` 2020թ-ի հունիսի 2-ին Եվրահանձնաժողովը հրապարակել էր ԵՄ ավիացիոն թարմացված «սև ցուցակը», որում առաջին անգամ ընդգրկվել էր նաև Հայաստանը՝ բոլոր տեղական ավիափոխադրողներով: «Սև ցուցակը» ԵՄ թռիչքային անվտանգության ցուցակն է (EU Air Safety List): ԵՄ-ի ավիացիոն կանոնակարգերի համաձայն` 2020թ–ի հունիսից արգելվել է հայկական ավիափոխադրողների մուտքը ԵՄ օդային տարածք:

news.am