Ուռուցքաբանության ազգային կենտրոնին տարեկան 800 մլն դրամի հատկացվող բյուջետային ֆինանսավորումը բավարար չէ և պետք է ավելացվի, ասաց Կենտրոնի մանկական ուռուցքաբանության և քիմիաթերապիայի բաժնի պետ պրոֆեսոր Գրիգոր Բադալյանը:
«Պետությունը տարեկան 800 մլն դրամ է հատկացնում ուռուցքային հիվանդների՝ ինչպես մեծահասակների, ակնպես էլ երեխաների, անվճար բուժմանը, սակայն այդ միջոցները սպառվել են, և այսօրվա դրությամբ մենք չենք կարող նոր հիվանդների ընդունել»,- չորեքշաբթի մամուլի ասուլիսի ընթացքում ասաց Բադալյանը:
Նա հայտնեց, որ պետպատվերի շրջանակներում մեկ հիվանդի բուժման համար ամսական հատկացվում է 60 հազար դրամ՝ քիմիաթերապիայի մեկ կուրս անցկացնելու համար, որն անցկացվում է ամեն ամիս կամ մեկուկես ամիսը մեկ անգամ:
Նա միաժամանակ պարզաբանեց, որ որոշ դեպքերում, եթե հիվանդի վիճակը ծանր է, ապա այդ գումարը կարող է հասնել 300 հազարի:
Բադալյանը հայտնեց, որ 2012 թվականի հոկտեմբերի 1-ից Կենտրոնում գործում է համաֆինանսավորման սկզբունքը, որի համաձայն, հիվանդները վճարում են իրենց բուժման համար պակասող գումարը, սակայն հիվանդը չի կարող ամբողջովին բուժում անցնել իր հաշվին:
«Հենց դա էլ դարձավ հիվանդների ընդունումը դադարեցնելու պատճառ»,- ասաց նա:
Բադալյանը միաժամանակ հայտնեց, որ կենտրոնը շարունակում է ընդունել ծանր վիճակում գտնվող երեխաների և նրանց բուժումն անցկացնել պահուստային միջոցների հաշվին:
«Այսօրվա դրությամբ ծանր հիվանդներին մենք խորհուրդ ենք տալիս բուժվել արտասահմանում, քանի որ կենտրոնում ժամանակակից սարքավորումների բացակայությունը խոչընդոտում է ծանր հինվանդների արդյունավետ բուժմանը»,- ավելացրեց Բադալյանը:
Նա նշեց նաև, որ զարգացած երկրներում ուռուցքային հիվանդություններից բուժված լինելու տոկոսը հասնում է 80 տոկոսի, մինչդեռ Հայաստանում այդ ցուցանիշը կազմում է 60-65 տոկոս:
Հայաստանում տարեկան գրանցվում է միջինը 80-100 ուռուցքային հիվանդության դեպք մինչև 14 տարեկան երեխաների շրջանում, ընդ որում՝ երկրում քաղցկեղից մահանում է տարեկան 30-40 երեխա:
Քաղցկեղի առավել տարածված տեսակներն են՝ արյան քաղցկեղը (հիվանդների ընդհանուր թվի մոտ 25 տոկոսը), ինչպես նաև գլխուղեղի և լիմֆահանգույցների քաղցկեղը (համապատասխանաբար, 17 և 15 տոկոս):
Հայաստանում 100 հազար բնակչության հաշվարկով քաղցկեղով հիվանդացության ցուցանիշը կազմում է 270, իսկ մահացության ցուցանիշը՝ 170: Նախորդ տարի քաղցկեղից մահվան դեպքերը Հայաստանում գերազանցել են 5 հազարը:
Հայաստանում քաղցկեղով հիվանդանալու և մահացության ցուցանիշների տարեկան աճը կազմում է մինչև 5 տոկոս: Մինչև 16 տարեկան երեխաների շրջանում այդ ցուցանիշը վերջին տարում չի ավելացել:
Աղբյուրը՝ arka.am
Լուսանկարը՝ arka.am
Անուն* | |
Ձեր էլ. հասցեն* | |
Ուղարկվող էլ. հասցեն* | |
Комментарии
нет комментариев
Написать комментарий
Комментарии может оставить только зарегистрированный пользователь.Вам необходимо авторизоваться или зарегистрироваться