Երևանում շուտով կբացվի տարածաշրջանի խոշորագույն բիզնես կենտրոնը

Շուտով Երևանում կբացվի Կովկասում ամենամեծ բիզնես կենտրոնը, որը նաև առաջինն է ոչ միայն Հայաստանում, այլև տարածաշրջանում՝ որպես «A» դասի բիզնես կենտրոն։ Խոսքը «Էլիտ Պլազա» անունը կրող 24 հազ. քմ տարածքով 18–հարկանի գեղեցիկ շինության մասին է, որը գտնվում է Երևանի կենտրոնում՝ Խորենացի և Դեղատան փողոցների միջև պարփակված հատվածում։ Կառույցի հարևանությամբ Կենտրոնական բանկն է, Ֆոնդային բորսան, Էկոնոմիկայի նախարարությունը, մի քանի բանկեր, ինչի պատճառով էլ այս հատվածը պայմանականորեն կրում է «Ֆինանսական թաղամաս» անունը։

«Էլիտ Պլազա» համալիրի կառուցապատումն իրականացրած և նաև սեփականատերը հանդիսացող «Էլիտ Գրուպ» ընկերության տնօրեն Արմեն Մկոյանը Tert.am–ի հետ զրույցում հավաստեց, որ նախատեսվում է, որ բացմանը ներկա հյուրերի թվում լինելու են նախագահ Սերժ Սարգսյանը և Միջազգային ֆինանսական կորպորացիայի (ՄՖԿ, անգլ.՝ IFC) ղեկավարություն, ինչը հիրավի կարևոր իրադարձություն է Հայաստանի համար։

ԴԺՎԱՐՈՒԹՅՈՒՆՆԵՐ ՀԱՂԹԱՀԱՐԵԼՈՎ

«Էլիտ Պլազայի» շինարարության մեկնարկը տրվել է 2007թ.–ին, երբ Հայաստանում, ինչպես և ամբողջ աշխարհում, բիզնես ակտիվությունը վերելքի վրա էր։ Դրան հաջորդած ֆինանսատնտեսական ճգնաժամով պայմանավորված ընկերության ղեկավարությունն անգամ ստիպված է եղել կանգնել շինարարությունը հետաձգելու կամ շարունակելու վերաբերյալ ռազմավարական որոշում կայացնելու խնդրի առաջ, և, այնուամենայնիվ, որոշումն ընդունվել է հօգուտ վերջին տարբերակի։

«Շինարարության շարունակությունը մեծ ներդրումներ էր պահանջում, քանի որ այն վաճառքի համար չէր, ամբողջը վարձակալության համար էր նախատեսված, և մենք ստիպված եղանք դիմել միջազգային ֆինանսական ինստիտուցիոնալ կազմակերպությունների' ներգրավելու միջոցներ' շինարարությունը ավարտելու համար»,– պատմեց Արմեն Մկոյանը։

Շարունակությունը՝ umba.am