Հայաստանն ընդգրկված է բիզնես սկսելու համար ամենագրավիչ իրավասություններ ունեցողների ցանկում

Հայաստանը, Ղազախստանի եւ Վրաստանի հետ միասին, ներառվել է 2023 թվականին ռուսաստանցիների համար բիզնես սկսելու ամենագրավիչ իրավասություններ ունեցողների թոփ 5-ում, գրում է РБК-ն՝ հղում անելով Uniwide Consulting-ի ավագ իրավաբան Ելենա Բելիշեւայի կարծիքին։

Նշվում է, որ 2022 թվականին այս երկրները հսկայական թվով դիմումներ են ստացել ռուս ձեռնարկատերերից՝ ընկերություններ գրանցելու եւ/կամ բանկային հաշիվներ բացելու համար։ Պատճառը Ռուսաստանի Դաշնության քաղաքացիների հետ առանց էական սահմանափակումների աշխատելու պատրաստակամությունն է։

Այս երկրներում գրանցվելու առավելությունները

Տեղական բանկերը ֆինանսական գործարքներ են իրականացնում Ռուսաստանի Դաշնության բանկերի հետ:

Ընկերության գրանցման եւ գործունեության, ինչպես նաեւ ընկերությունների հարկային եւ հաշվապահական հաշվետվությունների պատրաստման համակարգը շատ բաներով նման է ռուսականին։

Տարածված է ռուսերենը։ Կան ռուսախոս իրավաբաններ, հաշվապահներ, հարկային խորհրդատուներ։ Մասնավորապես, Ղազախստանում եւ Հայաստանում օրենսդրությունը եւ դրա մեկնաբանությունները հասանելի են ռուսերենով:

Թերությունները

Այս իրավասություններում գրանցված ընկերությունները չունեն ստանդարտ օֆշորային արտոնություններ: Իրականում դրանք նույն ՍՊԸ-ներն են, ինչ Ռուսաստանում։ Նրանք պարտավոր են հարկեր վճարել, հաշվետվություններ ներկայացնել եւ պետական մարմինների կողմից ստուգումներ անցնել:

Հայտերի մեծ հոսքի պատճառով բազմաթիվ ծառայությունների մատուցման արագությունը նվազել է։ Հատկապես նկատելի է բանկային հաշիվների բացման ժամկետների ավելացում։ Այժմ կան դիմումներ, որոնց համար հաշվեհամարի բացումը Հայաստանում շարունակվում է ավելի քան վեց ամիս։ Հայկական բանկում հաշիվ է բացվում օտարերկրյա ընկերության համար, տեղական ընկերությունների համար ժամկետներն այնքան էլ մեծ չեն, բայց նույնպես ուշացումներ լինում են։

Գործարար միջավայրն անընդհատ փոխվում է։ Օրինակ, հաշիվներ բացել ցանկացողների ներհոսքի պատճառով բանկերը սկսել են 200 000 դոլարից սկսած ավանդների կամ արժեթղթերի ներդրումային նվազագույն շեմեր սահմանել: Միեւնույն ժամանակ, Ռուսաստանի հետ տեղական բանկերի լայն համագործակցության շնորհիվ արեւմտյան թղթակից բանկերը մանրակրկիտ ստուգում են այս իրավասություններին վերաբերող բոլոր վճարումները եւ մերժում դրանցից շատերը։ Տեղական բանկերի օգտագործումը որպես օղակ, օրինակ՝ Ռուսաստան-Ղազախստան-ԵՄ շղթայում, գնալով բարդանում է։

Գաղտնիություն չկա՝ ընկերությունների եւ դրանց սեփականատերերի մասին տվյալները հասանելի են երրորդ անձանց: Անվանական ծառայություններ մատուցելը անօրինական գործունեություն է:

news.am