Կառավարությունն առաջարկում է խնամքի նպաստ նշանակել Հայաստանում բնակության վայրի հասցեով հաշվառում ունեցող եւ մինչեւ 2 տարեկան երեխա խնամող ծնողին՝ անկախ հաշվառման վայրից եւ վարձու աշխատող լինելու հանգամանքից: Օրենքի գործողությունը տարածվելու է այն դեպքերի վրա, երբ երեխան ծնվել է 2023 թ. հունվարի 1-ին կամ դրանից հետո: Ընդ որում, վարձու աշխատողների եւ գյուղաբնակ ծնողի համար գործող օրենսդրական կարգավորումները գործելու են, եթե երեխան ծնվել է մինչեւ 2023 թ. հունվարի 1-ը, իսկ գյուղաբնակ ծնողի դեպքում՝ նաեւ եթե դիմումը ներկայացվել է մինչեւ 2023 թ. դեկտեմբերի 31-ը:
Կառավարությունն առաջարկում է այս եւ այլ փոփոխություններ ու լրացումներ կատարել «Պետական նպաստների մասին» օրենքում, որը խորհրդարանն առաջին ընթերցմամբ քննարկել է հոկտեմբերի 4-ի նիստում: Աշխատանքի եւ սոցիալական հարցերի փոխնախարար Դավիթ Խաչատրյանի խոսքով՝ առաջարկվում է սահմանել նաեւ, որ մինչեւ երկու տարեկան երեխայի ծնողը կշարունակի նպաստը ստանալ նաեւ այն դեպքում, երբ վերադառնա աշխատանքի: Գործող կարգավորմամբ՝ երբ ծնողը վերադառնում է աշխատանքի, այդ պահից դադարեցվում է նպաստի վճարումը:
«2023 թ. միջնաժամկետ ծախսային ծրագրով նախատեսված է շուրջ 20 մլրդ 400 մլն դրամ բյուջետային հատկացում՝ այս օրենքը կիրառվելու դեպքում: Ներկայումս չափը կավելանա, եւ «Նվազագույն ամսական աշխատավարձի մասին» օրենքով աշխատավարձի չափը 75.000 դրամ սահմանվելու դեպքում մինչեւ երկու տարեկան երեխայի խնամքի նպաստի չափն աշխատող մայրերի համար, որոնք գտնվում են երեխայի խնամքի արձակուրդում, կսահմանվի դրա 50 տոկոսի չափով, իսկ չաշխատող մայրերի համար՝ դրա 85 տոկոսի չափով»,- պարզաբանել է Դավիթ Խաչատրյանը:
Պատգամավոր Բաբկեն Թունյանը հետաքրքրվել է, թե փոփոխության ադյունքում պետական բյուջեում հավելյալ որքան ծախս է ավելանալու: Փոխնախարարը հայտնել է, որ 2022 թ. համար այս հոդվածով նախատեսվել էր 9 միլիարդից մի փոքր ավելի գումար, սակայն ընթացիկ ցուցանիշները ցույց են տվել, որ համալրման կարիք կա: Հետեւաբար, առաջիկայում 3 մլրդ 800 մլն դրամի լրացուցիչ համալրում է նախատեսվում, իսկ 2023 թ. համար՝ 20 մլրդ 400 մլն դրամի: Այսինքն՝ այս տարվա բյուջեով ծրագրվածից գրեթե երկու անգամ ավելի, իսկ ճշգրտվածով՝ մոտ 80 տոկոս ավելի լրացուցիչ գումար կպահանջվի: «Պետք է նշեմ նաեւ, որ 2023 թ. ժողովրդագրական իրավիճակի բարելավմանն ուղղված ծրագրերի գծով ընդհանուր հատկացումը շուրջ 50 մլրդ դրամ է, որն այս տարվա համեմատ 50 տոկոսով ավելի է»,-հայտնել է Դավիթ Խաչատրյանը:
ԱԺ աշխատանքի եւ սոցիալական հարցերի մշտական հանձնաժողովի անդամ Զարուհի Բաթոյանը ներկայացրել է հանձնաժողովի դրական եզրակացությունը:
| Անուն* | |
| Ձեր էլ. հասցեն* | |
| Ուղարկվող էլ. հասցեն* | |
Комментарии
нет комментариев
Написать комментарий
Комментарии может оставить только зарегистрированный пользователь.Вам необходимо авторизоваться или зарегистрироваться