«Պետական տուրքի մասին» օրենքում լրացում և փոփոխություն կատարելու մասին», «Վիճակախաղերի մասին» օրենքում լրացումներ կատարելու մասին» և «Շահումով խաղերի, ինտերնետ շահումով խաղերի և խաղատների մասին» օրենքում լրացումներ կատարելու մասին» ՀՀ օրենքների նախագծեր

Նախագծերով առաջարկվում է բարձրաց­նել ինտեր­նետ շահումով խաղերի և վիճակախաղերի (տոտալիզատորի, ինտեր­նետ տոտա­­լի­զատոր) պետական տուրքի գծով բեռը և կարգավորել խաղադրույքների հաս­կա­ցու­թյան, ինչպես նաև կարգավորել խաղադրույքներ ընդունելու իրավունքի հետ կապված հարա­բե­րությունները:

Նախագիծ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՕՐԵՆՔԸ

«ՊԵՏԱԿԱՆ ՏՈՒՐՔԻ ՄԱՍԻՆ» ՕՐԵՆՔՈՒՄ ԼՐԱՑՈՒՄ ԵՎ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ

Հոդված 1. «Պետական տուրքի մասին» 1997 թվականի դեկ­տեմ­բերի 27-ի ՀՕ-186 օրենքում (այսուհետ՝ Օրենք) լրացնել հետևյալ բովանդակությամբ 19.14 հոդված.

«Հոդված 19.14 Ինտերնետ շահումով խաղի և (կամ) տոտալիզատորի (ինտերնետ տոտալիզատորի) կազմակերպչի կողմից խաղադրույք ընդունելու իրավունք ձեռք բերելու համար պետական տուրքի դրույքաչափերը

Ինտերնետ շահումով խաղի և (կամ) տոտալիզատորի (ինտերնետ տոտալիզատորի) կազմակերպչի կողմից խաղադրույք ընդունելու իրավունք ձեռք բերելու համար պետական տուրքը գանձվում է հետևյալ դրույքաչափերով.
Ինտերնետ շահումով խաղերի կազմակերպչի կողմից յուրաքանչյուր 100 միլիարդ դրամի չափով խաղադրույք ընդունելու իրավունք ձեռք բերելու համար՝
բազային տուրքի 300 000-ապատիկի չափով
Տոտալիզատորի (ինտերնետ տոտալիզատորի) կազմակերպչի կողմից յուրաքանչյուր 30 միլիարդ դրամի չափով խաղադրույք ընդունելու իրավունք ձեռք բերելու համար՝
բազային տուրքի 100 000-ապատիկի չափով
Սույն հոդվածով սահմանված պետական տուրքը վճարվում է մինչև խաղա­դրույք ընդունելու իրավունքի՝ սույն հոդվածով նախատեսված սահմանաչափերն ավարտվելու օրվան հաջորդող 5-րդ աշխատանքային օրը ներառյալ: Ինտերնետ շահումով խաղի և կամ վիճակախաղի լիցենզիան նոր ստացող կազմակերպությունը սույն հոդվածով սահմանված պետական տուրքն առաջին անգամ վճարում է համապատասխան լիցենզիայի տրամադրման օրվան հաջորդող 5 աշխատանքային օրերի ընթացքում:
Խաղադրույք ընդունելու իրավունք ձեռք բերելու համար սույն հոդվածով սահմանված չափով վճարված պետական տուրքը ձեռք բերված իրավունքից չօգտվելու դեպքում վերադարձման ենթակա չէ:»:
Հոդված 2. Օրենքի 32-րդ հոդվածի վերջին պարբերությունում «օրենքի 19.7-րդ և 19.8-րդ» բառերը փոխարինել «օրենքի 19.7-րդ, 19.8-րդ և 19.14-րդ» բառերով:

Հոդված 3. Եզրարափակիչ մաս

Սույն օրենքն ուժի մեջ է մտնում 2023 թվականի հունվարի 1-ից:
Հոդված 4. Անցումային դրույթներ

Ինտերնետ շահումով խաղերի կազմակերպչի կամ տոտալիզատորի (ինտերնետ տոտա­լիզա­տորի) կազմակերպչի կողմից սույն օրենքով սահմանաված՝ խաղադրույք ընդու­նելու իրավունքն առաջին անգամ ձեռք բերելու համար պետական տուրքը վճարվում է սույն օրենքն ուժի մեջ մտնելուց հետո՝ 10 աշխատանքային օրվա ընթացքում:

ՆԱԽԱԳԻԾ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՕՐԵՆՔԸ  

«ՎԻՃԱԿԱԽԱՂԵՐԻ ՄԱՍԻՆ» ՕՐԵՆՔՈՒՄ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ

Հոդված 1. «Վիճակախաղերի մասին» 2003 թվականի դեկտեմբերի 17-ի ՀՕ-3-Ն օրենքի (այսուհետ՝ Օրենք) 2-րդ հոդվածը լրացնել հետևյալ բովանդակությամբ 17-րդ և 18-րդ մասերով.

«17) Խաղադրույք (մասնակցության վճար)` իրադարձությունների ելքերի կամ խաղային մեկ համակցության համար անկանխիկ եղանակով վճարված դրամային միջոց, որի վճարման հիմքով կնքվում է խաղին մասնակցության և շահումի վճարման մասին պայմանագիրը։

18) խաղադրույք ընդունելու իրավունք՝ որը տրվում է Հայաստանի Հան­րապե­տու­թյան կառավարության սահմանած կարգով վիճակախաղի (վիճակախաղերի) կազ­մակերպման և անցկացման կանոնակարգում տոտալիզատորի (այդ թվում՝ ինտեր­նետ տոտալիզատորի) կազմակերպման գործունեություն իրականացնելու դեպ­քում խաղադրույքներ ընդունելու համար:»:

Հոդված 2. Օրենքի 4-րդ հոդվածի 1-ին մասում.

1) «վրա» բառից հետո լրացնել «, վիճակախաղի (վիճակախաղերի) կազմա­կերպ­ման և անցկացման կանոնակարգում տոտալիզատորի (այդ թվում՝ ինտերնետ տոտա­լիզատորի) կազմակերպման առկայության դեպքում նաև խաղադրույք ընդու­նելու իրավունքի հիման վրա:» բառերով:

2) լրացնել հետևյալ բովանդակությամբ նոր պարբերությամբ.

«Խաղադրույք ընդունելու իրավունքը տրվում է Հայաստանի Հան­րա­պե­տու­թյան կառավարության սահմանած կարգով՝ խաղադրույքներ ընդունելու համար «Պետա­կան տուրքի մասին» ՀՀ օրենքով սահմանված պետական տուրքի վճարման դեպ­քում, որի դրույքաչափ սահմանվում է կախված Կազմակեպչի կողմից ընդունված խաղա­դրույքների ընդհանհուր գումարից՝ ներառյալ իր կողմից իր հաշվին խաղա­ցո­ղին տրված խաղին մասնակցելու հնարավորությունները:»

Հոդված 3. Օրենքի 5-րդ հոդվածի 1-ին մասը լրացնել հետևյալ բովանդակությամբ «թ1»-րդ կետով.

«թ1) վիճակախաղի (վիճակախաղերի) կազմակերպման և անցկացման կանո­նակար­գում տոտալիզատորի (այդ թվում՝ ինտերնետ տոտալիզատորի) կազմակերպման առկա­յության դեպքում վճարում է «Պետական տուրքի մասին» Հայաստանի Հանրա­պե­տության օրենքով սահմանված ժամկետում խաղադրույք ընդունելու իրավունքի համար սահմանված պետական տուրքի գումարը»:

Հոդված 4. Օրենքի 15-րդ հոդվածի 1-ին մասի ա) կետում ««թ»» բառից հետո լրաց­նել ««թ1»» բառը:

Հոդված 5. Սույն օրենքն ուժի մեջ է մտնում 2023 թվականի հունվարի 1-ից: 

ՆԱԽԱԳԻԾ 

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔԸ

 «ՇԱՀՈՒՄՈՎ ԽԱՂԵՐԻ, ԻՆՏԵՐՆԵՏ ՇԱՀՈՒՄՈՎ ԽԱՂԵՐԻ ԵՎ ԽԱՂԱՏՆԵՐԻ ՄԱՍԻՆ» ՕՐԵՆՔՈՒՄ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ

Հոդված 1. «Շահումով խաղերի, ինտերնետ շահումով խաղերի և խաղատների մասին» 2003 թվականի դեկտեմբերի 13-ի ՀՕ-1-Ն օրենքի (այսուհետ՝ Օրենք) 2-րդ հոդվածը լրացնել հետևյալ բովանդակությամբ նոր պարբերություններով.

«խաղադրույք (մասնակցության վճար)` դրամական միջոցներ, որոնք խաղացողի կողմից անկան­խիկ եղանակով փոխանցվում են կազմակերպչին և ծառայում են որպես շահումով խաղերի մասնակցելու պայման՝ կազմակերպչի կողմից սահմանված կանոններին համա­պա­տաս­խան.

Խաղադրույք ընդունելու իրավունք` որը տրվում է Հայաստանի Հանրապետության կառա­վա­րության սահմանած կարգով ինտերնետ շահումով խաղի կազմակերպման գործունեություն իրա­կանացնելու դեպքում խաղադրույքներ ընդունելու համար:»:

Հոդված 2. Օրենքի 4-րդ հոդվածում .

1) «վրա» բառից հետո լրացնել «, ինտերնետ շահումով խաղերի գործունեության դեպքում նաև «Պետական տուրքի մասին» ՀՀ օրենքով համապատասխան քվոտայի համար սահմանված պետական տուրքի վճարման դեպքում:» բառերով:

2) լրացնել հետևյալ բովանդակությամբ նոր պարբերություն

«Խաղադրույք ընդունելու իրավունքը տրվում է Հայաստանի Հանրապետության կառա­վա­­րության սահմանած կարգով՝ խաղադրույքներ ընդունելու համար «Պետական տուրքի մասին» ՀՀ օրենքով սահմանված պետական տուրքի վճարման դեպքում, որի դրույքաչափ սահ­ման­վում է կախված Կազմակեպչի կողմից ընդունված խաղադրույքների ընդհանհուր գումարից՝ ներա­ռյալ իր կողմից իր հաշվին խաղացողին տրված խաղին մասնակցելու հնարա­վո­րու­թյուն­ները: »:

Հոդված 3. Օրենքի 6-րդ հոդվածի 2.1-ին մասը լրացնել հետևյալ բովանդակությամբ «թ1»-րդ կետով.

«Է1) վճարում է «Պետական տուրքի մասին» Հայաստանի Հանրապետության օրենքով սահ­ման­ված ժամկետում խաղադրույք ընդունելու իրավունքի համար սահմանված պետական տուրքի գումարը.»:

Հոդված 4. Օրենքի 14-րդ հոդվածի 1-ին մասի ա) կետում ««է»» բառից հետո լրացնել «կամ «է1»» բառերը:

Հոդված 5. Սույն օրենքն ուժի մեջ է մտնում 2023 թվականի հունվարի 1-ից:

 Նախագիծ-պետտուրքՆախագիծ-վիճակախաղՆախագիծ-շահումով խաղՀիմնավորում

Հիմնավորում

«Պետական տուրքի մասին» օրենքում լրացում և փոփոխություն կատարելու մասին», «Վիճակախաղերի մասին» օրենքում լրացումներ կատարելու մասին» և «Շահումով խաղերի, ինտերնետ շահումով խաղերի և խաղատների մասին» օրենքում լրացումներ կատա­րելու մասին» ՀՀ օրենքների նախագծերի վերաբերյալ

1. Իրավական ակտի անհրաժեշտությունը (նպատակը). Նախագծերի նպատակը խաղա­յին ոլորտի (ինտեր­նետ շահումով խաղերի և տոտալիզատորի, ինտերնետ տոտա­լի­զա­տորի) հարկային բեռի վերանայումն է:

2. Կարգավորման հարաբերությունների ներկա վիճակը և առկա խնդիրները. Գոր­ծող օրենսդրությամբ ինտեր­նետ շահումով խաղերի և վիճակախաղերի (տոտալիզատորի, ինտեր­նետ տոտա­լի­զատոր) կազմակերպումը համարվում են լիցենզավորման ենթակա գոր­ծու­նեության տեսակներ, որոնց իրականացման համար սահմանված է տարեկան 600 մլն դրամի չափով պետական տուրք: Բացի այդ, ինտեր­նետ շահումով խաղերի գործունեությունը՝ 2021 թվականի հունվարի 1-ից, իսկ տոտալիզատորի և ինտեր­նետ տոտա­լի­զատորի գործու­նեու­­թյունը 2020 թվականի հունվարի 1-ից սկսել են հարկվել շահութահարկով:

Խնդիրը կայանում է նրանում, որ 2017-2019 թվականների ընթացքում ինտեր­նետ շահու­մով խաղերի և վիճակախաղերի (տոտալիզատորի, ինտեր­նետ տոտա­լի­զատոր) կազ­մա­կերպ­ման համար պետական տուրքը կազմել է 500 մլն դրամ, իսկ 2020 թվականից 600 մլն դրամ է:  Մյուս կողմից, սկսած 2017 թվականից, ոլորտի ծավալներն էականորեն աճել են՝ մոտ 28 անգամ: Մասնավորապես, 2017 թվականին ոլորտի կողմից ընդունվող խաղադրույք­ների ծավալը կազ­մել է 138,5 մլրդ դրամ, իսկ 2021 թվականին` 3.931 մլրդ դրամ: Մյուս տարի­ներին ընդունվող խաղադրույք­ների ծավալը համապատասխանաբար կազմել է 2018-ին` 333,6 մլրդ, 2019-ին` 1.116,1 մլրդ, 2020-ին` 1.980,8 մլրդ դրամ:

 Արդյուն­քում, չնայած այն հան­­գամանքին, որ 2020 և 2021 թվականներից ոլորտը սկսել է հարկվել շահութահարկով, ոլորտի կողմից վճարվող հար­կերը և տուրքերը համարժեք չեն ոլորտի աճի տեմպերի և ՀՆԱ-ում ոլորտի կշռի հետ: Մյուս կողմից, կատարված խաղադրույք­ների ծավալների աճը մտահոգիչ է և անհրաժեշտ է տար­բեր գործիքներով, այդ թվում՝ հար­կա­յին, զսպել խաղա­դրույքների կատարումը:

3. Առկա խնդիրների առաջարկվող լուծումները. Նախագծերով առաջարկվում է բարձրաց­նել ինտեր­նետ շահումով խաղերի և վիճակախաղերի (տոտալիզատորի, ինտեր­նետ տոտա­­լի­զատոր) պետական տուրքի գծով բեռը և կարգավորել խաղադրույքների հաս­կա­ցու­թյան, ինչպես նաև կարգավորել խաղադրույքներ ընդունելու իրավունքի հետ կապված հարա­բե­րությունները: Նախագծերով, մասնավորապես, առաջարկվում է սահ­մանել, որ՝

վիճակախաղերի մասով խաղադրույք (մասնակցության վճար) է համարվում իրա­դար­ձու­թյունների ելքերի կամ խաղային մեկ համակցության համար անկանխիկ եղանակով վճար­ված դրամային միջոցը, որի վճարման հիմքով կնքվում է խաղին մասնակցության և շահումի վճարման մասին պայմանագիրը,
ինտերնետ շահումով խաղերի մասով խաղադրույք (մասնակցության վճար) են համար­­վում դրամական միջոցները, որոնք խաղացողի կողմից անկան­խիկ եղանակով փոխանց­վում են կազմակերպչին և ծառայում են որպես շահումով խաղերի մասնակցելու պայ­ման՝ կազմակերպչի կողմից սահմանված կանոններին համա­պա­տաս­խան,
ինտերնետ շահումով խաղերի կազմակերպչի կողմից յուրաքանչյուր 100 միլիարդ դրամի չափով խաղադրույք ընդունելու իրավունք ձեռք բերելու համար պետական տուրքը կազ­մում է 300 մլն դրամ,
տոտալիզատորի (ինտերնետ տոտալիզատորի) կազմակերպչի կողմից յուրաքանչյուր 30 միլիարդ դրամի չափով խաղադրույք ընդունելու իրավունք ձեռք բերելու համար պետական տուրքը կազմում է 100 մլն դրամ:
4. Կարգավորման առարկան. Նախագծերի կարգավորման առարկան ինտեր­նետ շահու­­մով խաղերի և վիճակախաղերի տոտալիզատորի, ինտեր­նետ տոտա­­լի­զատոր ընդուն­վող խաղադրույքներն են:

5. Նախագծի մշակման գործընթացում ներգրավված ինստիտուտները և անձինք. Նախա­գծերը մշակվել են ՀՀ ֆինանսների նախարարության կող­­մից:

6. Իրավական ակտի ընդունման արդյունքում ակնկալվող արդյունքը. Նախա­գծերի ընդուն­­­­­­­­­­­­­­­­­­­­­­­­­­­ման արդ­յուն­­քում ակնկալվում է բարձրացնել ինտեր­նետ շահումով խաղերի և վիճա­կա­­խաղերի (տոտալիզատորի, ինտեր­նետ տոտա­­լի­զատոր) կազմակերպիչների պետական տուրքի գծով բեռը:

Միաժամանակ, նախագծի ընդունումը լրացուցիչ ֆինանսական միջոցների անհրա­ժեշ­տու­թյուն չի պահանջում, իսկ դրա ընդուն­­մամբ պայմանավորված՝ պե­տա­­կան բյուջեի եկա­­մուտ­­­ների էական նվա­­զե­­ցում կամ ծախ­­­­սերի ավելա­ցում տեղի չի ունենա:

7. Կապը ռազմավարական փաստաթղթերի հետ. Հայաստանի վերափոխման ռազ­մա­վա­րություն 2050, Կառավարության 2021-2026թթ. ծրագիր, ոլորտային և/կամ այլ ռազ­­­­մա­վա­րություններ.

Նախագիծը բխում է Կառավարության 2021-2026 թվականների ծրագրի 6.8-րդ «Հար­կա­­բյու­ջետային քաղաքականություն» մասով սահմանված քաղաքականության ուղղու­թյուն­նե­րից: Մասնավորապես, Կառավարությունը նպատակ ունի ապահովել հարկեր/ՀՆԱ ցուցա­նիշի բարելավում առն­վազն 2.6 տոկոսային կետով՝ 2026 թվականին հարկեր/ՀՆԱ ցուցանիշը հասց­նելով առնվազն 25 տոկոսի: