«Պետական տուրքի մասին» Հայաստանի Հանրապետության օրենքում լրացումներ և փոփոխություններ կատարելու մասին

Սույն օրենքը կանոնակարգում է Հայաստանի Հանրապետության համար ռազմավարական նշանակություն ունեցող ապրանքների (սև և գունավոր մետաղների) արտաքին առևտուրը։  

Միևնույն ժամանակ առաջարկվող իրավական կարգավորումները  համահունչ դարձնելու «Եվրասիական տնտեսական միության մասին» պայմանագրի դրույթներին՝ առաջարկվում է վերապահում սահմանել վերը նշված ապրանքների արտահանման մասով, այն է՝ սահմանել, որ նշված սահմանափակումները չեն վերաբերում ԵԱՏՄ երկրներ տեղափոխվող վերը նշված ապրանքների վրա։

Նախագիծ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Օ Ր Ե Ն Ք Ը 

«ՊԵՏԱԿԱՆ ՏՈՒՐՔԻ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔՈՒՄ  ԼՐԱՑՈՒՄՆԵՐ ԵՎ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ

 Հոդված 1. «Պետական տուրքի մասին» Հայաստանի Հանրապետության 1997 թվականի դեկտեմբերի 27-ի ՀՕ-186 օրենքի (այսուհետ` Օրենք) 19.6-րդ հոդվածը լրացնել հետևյալ մասերով.

7. «Արտաքին տնտեսական գործունեության ապրանքային անվանացանկ» (ԱՏԳ ԱԱ) դասակարգչի 7206 ծածկագրին դասվող երկաթ և չլեգիրված պողպատ՝ ձուլակտորներով կամ այլ սկզբնական ձեւերով արտահանելու յուրաքանչյուր մեկ տոննայի լիցենզիաներ կամ թույլտվություններ կամ հավաստագրեր տրամադրելու համար, բացառությամբ ԵԱՏՄ երկրների
բազային տուրքի
- 110-ապատիկի չափով

 8. «Արտաքին տնտեսական գործունեության ապրանքային անվանացանկ» (ԱՏԳ ԱԱ) դասակարգչի 7207 ծածկագրին դասվող կիսապատրաստուկներ երկաթից կամ չլեգիրված պողպատից արտահանելու յուրաքանչյուր մեկ տոննայի լիցենզիաներ կամ թույլտվություններ կամ հավաստագրեր տրամադրելու համար, բացառությամբ ԵԱՏՄ երկրների
բազային տուրքի
- 110-ապատիկի չափով

 9. «Արտաքին տնտեսական գործունեության ապրանքային անվանացանկ» (ԱՏԳ ԱԱ) դասակարգչի 2616 ծածկագրին դասվող թանկարժեք մետաղների հանքաքարերում և խտահանքերում պարունակող պղնձի պարունակության յուրաքանչյուր մեկ տոննայի արտահանելու լիցենզիաներ կամ թույլտվություններ կամ հավաստագրեր տրամադրելու համար, բացառությամբ ԵԱՏՄ երկրների
բազային տուրքի
- 160-ապատիկի չափով

 10. «Արտաքին տնտեսական գործունեության ապրանքային անվանացանկ» (ԱՏԳ ԱԱ) դասակարգչի 7403290000 ծածկագրին դասվող պղնձի համաձուլվածքներ արտահանելու յուրաքանչյուր մեկ տոննայի լիցենզիաներ կամ թույլտվություններ կամ հավաստագրեր տրամադրելու համար, բացառությամբ ԵԱՏՄ երկրների
բազային տուրքի
- 140-ապատիկի չափով

11. «Արտաքին տնտեսական գործունեության ապրանքային անվանացանկ» (ԱՏԳ ԱԱ) դասակարգչի 7601, 7603 ծածկագրերին դասվող չմշակված ալյումին, ալյումինի փոշիներ և թեփուկներ արտահանելու յուրաքանչյուր մեկ տոննայի լիցենզիաներ կամ թույլտվություններ կամ հավաստագրեր տրամադրելու համար, բացառությամբ ԵԱՏՄ երկրների
բազային տուրքի
- 120-ապատիկի չափո

Հոդված 2.

Օրենքի 20-րդ հոդվածի 15-րդ մասի «արտահանման» բառից հետո լրացնել «,բացառությամբ ԵԱՏՄ երկրների,» բառերը։

Հոդված 3.

Օրենքի 20-րդ հոդվածի 15.1-րդ մասի «արտահանման» բառից հետո լրացնել «,բացառությամբ ԵԱՏՄ երկրների,» բառերը։

Հոդված 4.

Օրենքի 20-րդ հոդվածի 15.2-րդ մասի տեքստը շարադրել հետևյալ խմբագրությամբ.

«15.2 ԱՏԳ ԱԱ 7201, 7204, 7303 00, 7304, 7305, 7306, 7307, 7308 ծածկագրերին (իսկ 7302 ծածկագրից՝ ռելսերի, 7325 և 7326 ծածկագրերից` սև մետաղից սալիկների և աղացագնդերի, 7322 ծածկագրերից՝ օգտագործված թուջե ռադիատորների) դասվող սև մետաղի թափոնների և ջարդոնի, սև մետաղից պատրաստված խողովակների և դրանց կցամասերի, սև մետաղական կոնստրուկցիաների յուրաքանչյուր տոննայի արտահանման համար, բացառությամբ ԵԱՏՄ երկրների (սույն կետով նախատեսված` պետական տուրքի վճարման պարտավորությունը չի տարածվում «Ժամանակավոր ներմուծում» և «Վերամշակում մաքսային տարածքում» մաքսային ընթացակարգերով ձևակերպված և հետագայում վերաարտահանվող, ինչպես նաև Հայաստանի Հանրապետությունում արտադրված` վերոնշյալ ԱՏԳ ԱԱ ծածկագրերին դասվող (բացառությամբ ԱՏԳ ԱԱ 7201, 7204) ապրանքների վրա):»:

 Հոդված 5.

Օրենքի 20-րդ հոդվածի 15.3-րդ մասի տեքստը շարադրել հետևյալ խմբագրությամբ.

«15.3 ԱՏԳ ԱԱ 7404 00, 7503 00, 7602 00, 7802 00 000, 7902 00 000, 8002 00 000, 8101 97 000, 8102 97 000, 8103 30 000, 8104 20 000, 8105 30 000, 8106, 8108 30 000, 8109 3, 8110 20 000, 8111 00 190, 8112 13 000, 8112 22 000, 8112 31 000 0, 8112 41 00 01, 8112 52 000, 8112 61 00, 8112 92 210, 8113 00 400 ծածկագրերին դասվող գունավոր մետաղի թափոնների և ջարդոնի,  (բացառությամբ «ժամանակավոր ներմուծում» և «Վերամշակում մաքսային տարածքում» մաքսային ընթացակարգերով ձևակերպված և հետագայում վերաարտահանվող վերոնշյալ ԱՏԳ ԱԱ ծածկագրերին դասվող ապրանքների) յուրաքանչյուր տոննայի արտահանման, բացառությամբ ԵԱՏՄ երկրների, համար:»:

Հոդված 6.

Օրենքի 38-րդ հոդվածի 4-րդ մասում «2-6-րդ» թվերը փոխարինել «2-11-րդ» թվերով: 

ԱՆՑՈՒՄԱՅԻՆ ԴՐՈՒՅԹՆԵՐ

Հոդված 7. Օրենքի ուժի մեջ մտնելը

Սույն օրենքն ուժի մեջ է մտնում պաշտոնական հրապարակմանը հաջորդող 30-րդ օրվանից:
Սույն օրենքը տարածվում է օրենքն ուժի մեջ մտնելուց հետո լիցենզիա (հավաստագիր, թույլտվություն) ստանալու համար ներկայացված հայտերի վրա։

ՀԻՄՆԱՎՈՐՈՒՄ

«ՊԵՏԱԿԱՆ ՏՈՒՐՔԻ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔՈՒՄ  ԼՐԱՑՈՒՄՆԵՐ ԵՎ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔԻ ՆԱԽԱԳԾԻ

Անհրաժեշտությունը
   Սույն օրենքի ընդունումը պայմանավորված է` Հայաստանի Հանրապետության համար ռազմավարական նշանակություն ունեցող ապրանքների (սև և գունավոր մետաղների) արտաքին առևտուրը կանոնակարգելու անհրաժեշտությամբ։

Ընթացիկ իրավիճակը և խնդիրները
Վերջին տարիներին համաշխարհային շուկայում արձանագրվում է գունավոր մետաղների բորսայական գների աճ, ինչը  բարենպաստ պայմաններ է ստեղծում Հայաստանի մետաղական հանքարդյունաբերության ոլորտի եկամուտների աճի և ոլորտի հետագա զարգացման համար։

Մասնավորապես՝ սկսած 2020 թվականի ապրիլից համաշխարհային շուկայում գրանցվում է պղնձի միջազգային գնի աճ կամ կայուն բարձր գին (պղնձի գինը միջազգային բորսայում ներկայումս կազմում է 9,5-10 հազ. ԱՄՆ դոլար)։

Վերը նշված գնային ցուցանիշները բարենպաստ նախադրյալներ  են ստեղծում հանքարդյունաբերության ոլորտի գործունեության համար և անհրաժեշտություն է առաջանում պետական սեփականություն հանդիսացող ընդերքից գեներացվող շահույթն արդարացի բաշխելու և ընդերքի շահագործումից պետական բյուջեի մուտքերը համալրելու համար, ուստի  առաջարկվում է 2021 թվականին սահմանված՝ պղնձի, մոլիբդենի խտանյութի և ֆեռոմոլիբդենի՝ դեպի երրորդ երկրներ արտահանելու գործունեությունը լիցենզավորվող սահմանող ցանկը համալրել նաև ԱՏԳ ԱԱ 2616 ծածկագրին դասվող թանկարժեք մետաղների հանքաքարերի և խտահանքերի պղնձի պարունակության, 7403290000 ծածկագրին դասվող պղնձի համաձուլվածքների և 760120 ծածկագրին դասվող ալյումինե համաձուլվածքների արտահանման գործընթացը նույնպես սահմանել լիցենզավորվող։

Միևնույն ժամանակ հաշվի առնելով Հայաստանում սև մետաղի արդյունահանվող պաշարների բացակայությունը և կարևորելով սև մետաղի ջարդոնն ու թափոնը տեղում վերամշակելու և առավել բարցր ավելացված արժեքով ապրանք արտադրելու նպատակահարմարությունը՝ առաջարկվում է որպես լիցենզավորվող գործունեություն սահմանել 7206 ծածկագրին դասվող երկաթի և չլեգիրված պողպատի՝ ձուլակտորներով կամ այլ սկզբնական ձևերով, 7207 ծածկագրին դասվող երկաթից կամ չլեգիրված պողպատից կիսապատրաստուկների արտահանման գործունեությունը։ Նշված առաջարկը հավասար մրցակցային պայմաններ կստեղծի սև մետաղի ջարդոնի և թափոնի արտահանման և տեղում վերամշակման համար։

Նախագծով առաջարկվում է սահմանել պետական տուրք ԱՏԳ ԱԱ 7206, 7207, 2616, 7403290000, 7601, 7603  ծածկագրերին դասվող ապրանքների յուրաքանչյուր մեկ տոննայի դեպի երրորդ երկրներ արտահանելու լիցենզիաներ կամ թույլտվություններ կամ հավաստագրեր տրամադրելու համար սահմանել պետական տուրք, նշված ապրանքների միջին միջազգային գնի մոտ 10%-ի չափով։

Միևնույն ժամանակ առաջարկվող իրավական կարգավորումները  համահունչ դարձնելու «Եվրասիական տնտեսական միության մասին» պայմանագրի դրույթներին՝ առաջարկվում է վերապահում սահմանել վերը նշված ապրանքների արտահանման մասով, այն է՝ սահմանել, որ նշված սահմանափակումները չեն վերաբերում ԵԱՏՄ երկրներ տեղափոխվող վերը նշված ապրանքների վրա։

Նախագծի մշակման համար հիմք է հանդիսացել  նաև ընդերքի պաշտպանությունը (ինչը ամրագրված է «Առևտրի ու ծառայությունների մասին» ՀՀ օրենքով, ինչպես նաև  «Եվրասիական տնտեսական միության մասին» պայմանագրի Հավելված 7-ի 38-րդ կետի 6-րդ ենթակետով՝ կապված անդամ պետությունների տարածքներից ծագող ապրանքների արտահանումը սահմանափակելու հետ՝ ներքին մշակող արդյունաբերությունն այդ նյութերի բավարար քանակով ապահովելու նպատակով այն ժամանակահատվածներում, երբ կառավարության կողմից իրականացվող կայունացման նախագծի արդյունքում նման ապրանքների ներքին գինն ավելի ցածր է, քան համաշխարհային գինը։

«Պետական տուրքի մասին» Հայաստանի Հանրապետության օրենքում լրացումներ և փոփոխություններ կատարելու մասին» Հայաստանի Հանրապետության օրենքն ընդունելու կապակցությամբ լրացուցիչ ֆինանսական միջոցների անհրաժեշտություն չկա, իսկ պետական բյուջեում նախատեսում է եկամուտների ավելացում:

«Պետական տուրքի մասին» Հայաստանի Հանրապետության օրենքում լրացումներ և փոփոխություններ կատարելու մասին» Հայաստանի Հանրապետության օրենքի նախագծի ընդունումից հետո անհրաժեշտություն կառաջանա մշակել և հաստատել Հայաստանի Հանրապետության կառավարության որոշման նախագիծ՝ նշված ապրանքների արտահանման համար լիցենզիաների տրամադրման կարգի և պայմանների վերաբերյալ: ՀՀ Ազգային Ժողովի կողմից սույն օրենքի ընդունման և այն ուժի մեջ մտնելուց հետո ՀՀ կառավարության որոշման նախագիծը սահմանված կարգով կներկայացվի ՀՀ կառավարության քննարկմանը:

Տվյալ բնագավառում իրականացվող քաղաքականությունը
Կայուն զարգացման երկարաժամկետ նպատակի խթանմանն ուղղված քաղաքականության մշակում ու իրականացում։

Կարգավորման նպատակը և բնույթը
Արտադրական շղթաների երկարացում, առավել բարդ և բարձրարժեք արտադրանքի խթանում:

Նախագծի մշակման գործընթացում ներգրավված ինստիտուտները և անձիք

Նախագիծը մշակվել է ՀՀ էկոնոմիկայի նախարարության կողմից` հաշվի առնելով շահագրգիռ պետական մարմինների դիրքորոշումները:

Ակնկալվող արդյունքը
Սույն նախագծի ընդունումը հնարավորություն կտա գունավոր մետաղների բարձր գնային միջակայքի պայմաններում իրականացնել ընդերքի շահագործումից ստացվող շահույթները բաշխել արդարացի, իսկ սև մետաղների պարագայում՝ խթանել Հայաստանի համար ռազմավարական ապրանքներ համարվող սև մետաղների վերամշակման խորացումը՝ ինչը կնպաստի արտերկրից ներմուծման կրճատմանը, տեղական արտադրության զարգացմանը և նոր աշխատատեղերի ստեղծմանը։

Կապը ռազմավարական փաստաթղթերի հետ
«Պետական տուրքի մասին» Հայաստանի Հանրապետության օրենքում փոփոխություններ և լրացում  կատարելու մասին» Հայաստանի Հանրապետության օրենքի նախագիծը բխում է ՀՀ կառավարության 2021-2026 թվականների գործունեության միջոցառումների ծրագիրը հաստատելու մասին 18.11.2021թ. N 1902-Լ որոշմամբ հաստատված պահանջներից և ապահովում է Հավելված 1-ի «ՀՀ էկոնոմիկայի նախարարություն» բաժնի 5.5-րդ կետով սահմանված դրույթի շարունակականությունը, այն է՝

Ներքին շուկայի պաշտպանության և հակագնագցման միջոցների կիրառման քաղաքականության մշակում,
Հայրենական արտադրողների համար հավասար մրցակցային պայմանների ապահովում։
 
Այլ տեղեկություններ (եթե այդպիսիք առկա են)
 «Պետական տուրքի մասին» Հայաստանի Հանրապետության օրենքում լրացումներ և փոփոխություններ կատարելու մասին» Հայաստանի Հանրապետության օրենքի նախագծի հանրային քննարկում իրականացնելու նպատակով այն տեղադրվել է իրավական ակտերի նախագծերի հրապարակման միասնական կայքում (e-draft) քննարկման։