• Armenianeconomy.com

Քննարկում խաղողի մթերման մեկնարկին ընդառաջ․ Վահան Քերոբյանը հանդիպել է գինի և կոնյակ արտադրող ընկերությունների ներկայացուցիչների հետ

19 հուլիսի 2021 | Տնտեսություն | Цитата

Հուլիսի 17-ին ՀՀ էկոնոմիկայի նախարարի պաշտոնակատար Վահան Քերոբյանը հանդիպել է գինի և կոնյակ արտադրող շուրջ 40 ընկերությունների ներկայացուցիչների հետ։ Հանդիպումը կայացել է «Արմենիա Վայն» ընկերությունում, և քննարկման նպատակը խաղողի մթերման մեկնարկին ընդառաջ գինեգործության և կոնյակագործության ոլորտներում առկա խնդիրների վերրհանումն էր ու դրանց լուծման հնարավոր տարբերակների շուրջ մտքերի փոխանակումը։

Քննարկմանը ներկա էին նախարարի տեղակալ Արման Խոջոյանը, Հայաստանի խաղողագործության և գինեգործության հիմնադրամի գործադիր տնօրեն Զարուհի Մուրադյանը և ոլորտի այլ պատասխանատուներ։

Հանդիպման ընթացքում քննարկվել են ագրովերամշակման ոլորտին վերաբերող մի շարք հարցեր, որոնց թվում էին ոլորտի ընկերությունների գործունեության արդյունավետության ապահովման, մթերման գործընթացի սահուն կազմակերպման, արտասահմանյան շուկաներում հայկական գինու և կոնյակի ճանաչելիության ու մրցունակության բարձրացման, իրացման շուկաների ընդլայնման, ինչպես նաև գինեգործական և կոնյակագործական արտադրանքի մարքեթինգի և բրենդավորման հարցերը։ 

«Այսօր հանդիպել ենք գինեգործների և կոնյակագործների հետ՝ խոսելու մի շարք հարցերի շուրջ, որոնցից ամենակարևորը խաղողի մթերմանը նախապատրաստվելն է։ Ուրախությամբ կարող եմ արձանագրել, որ ըստ այսօր մեզ տրամադրած տեղեկատվության, մթերման գործընթացը նախատեսվում է սահուն կազմակերպել։ Քննարկել ենք նաև ոլորտի երկարաժամկետ ու միջնաժամկետ պլանները, վերլուծել և վեր ենք հանել այն խոչընդոտները, որոնք պետք է հիմա վերացնել, որպեսզի ոլորտն ավելի արագ զարգանա»․ Վահան Քերոբյան

 Նախարարի պաշտոնակատար Վահան Քերոբյանը քննարկման ընթացքում կարևորել է նաև գյուղատնտեսությունը ստվերից դուրս բերելու նպատակով հարկային բարեփոխումների անհրաժեշտությունը՝ ընդգծելով գործող հարկային մեխանիզմների պարագայում հարկային բեռի ոչ համաչափ և ոչ արդար բաշխվածությունը տարբեր ոլորտների միջև։ Անդրադարձ է եղել հողերը գյուղատնտեսական նպատակով արդյունավետ օգտագործման համար հողային ռեֆորմների շուրջ աշխատանքների իրականացման անհրաժեշտությանը։

Նախարարի տեղակալ Արման Խոջոյանն իր հերթին ներկայացրել է պետության կողմից գյուղատնտեսական հումքի մթերումների նպատակով տրամադրվող վարկերի տոկոսադրույքների սուբսիդավորման ծրագրում իրականացված փոփոխությունները, որոնց նպատակը մթերող ընկերություններին տրամադրվող աջակցությունն  ավելի առարկայական դարձնելն է։   

«Ծրագրում ավելացել է մեկ կարևոր բաղադրիչ, որը նախորդ տարիներին մեր մթերողները որպես խնդիր բարձրաձայնում էին՝ գրավի առարկայի հարցը։ Այսօր կառավարությունը պատրաստ է 50% գրավի ռիսկը վերցնել իր վրա և տրամադրել պետական երաշխիք։ Կարծում եմ, որ այս գործիքը էապես կնպաստի մթերման սեզոնին ցանկալի ֆինանսական ռեսուրսների ներգրավմանը», - հավելել է փոխնախարարը։

Արման Խոջոյանը նաև տեղեկացրել է, որ նախքան մթերման շրջանի մեկնարկը նախատեսվում է նախաձեռնել մի շարք այլ նման հանդիպումներ՝ գործարարների կողմից խաղողի մթերման ծավալները հստակեցնելու նպատակով։  

Առանձին անդրադարձ է կատարվել տեղածին հայկական խաղողի սորտերի վերականգնմանը, ֆիլոքսերա վնասատուի դեմ պայքարի շրջանակում իրականացվող միջոցառումներին, Վրաստանի տարածքով դեպի այլ երկրներ կոնյակի սպիրտ և գինի տարանցիկ տեղափոխման ընթացքում առաջացող խնդիրներին, Վրաստանի Կախեթի տեղանվան պահպանմանը զուգահեռ Հայաստանում արտադրվող Կախեթի խաղողի սորտի գինիների անխոչընդոտ վաճառքի կազմակերպման շուրջ տարվող աշխատանքներին։

Հայաստանի խաղողագործության եւ գինեգործության հիմնադրամի գործադիր տնօրեն Զարուհի Մուրադյանը նշել է. «Հայաստանի գինեգործության զարգացման ճանապարհին մենք պետք է շեշտադրումը դնենք հայկական տեղածին սորտերի վրա, և այս ուղղությամբ Հիմնադրամն իրականացնում է տնկարանների հիմնման ծրագիրը։ Մենք ուսումնասիրել ենք բոլոր մեր տեղածին սորտերը, վիրուսները և շուտով կիրականացնենք պատվաստման գործընթացը, որպեսզի հասկանանք, թե որ արմատակալների վրա ավելի լավ կհարմարեցվեն մեր տեղածին սորտերը»։

Զարուհի Մուրադյանի փոխանցմամբ հայկական գինիների առաջմղման և ճանաչելիության բարձրացման նպատակով շուտով Բեռլինում կգործարկվի գինիների վաճառքի առցանց հարթակը, որտեղ համատեղ կներկայացվեն ավելի քանի 34 ընկերության 96 տեսակի գինիներ․ եվրապացի գինեսեր հանրությունը կկարողանա պատվիրել այդ գինիները առցանց եղանակով։   

Հանդիպման ավարտին «Արմենիա վայն» ընկերության համահիմնադիր Վահագն Մկրտչյանը տեղեկացրել է, որ առաջիկայում ընկերության տարածքում կբացվի Գինու պատմության թանգարանը, որում ներկայացված կլինի Հայաստանի գինեգործության պատմության ողջ ընթացքը՝ սկսած նախաքրիստոնեական շրջանից մինչև մեր օրերը։ Թանգարանում  կներկայացվեն գինեգործական բացառիկ ցուցանմուշներ, հնագույն գործիքներ, այցելուների համար կկազմակերպվի ինտերակտիվ խաղարկային տեսանյութերի ցուցադրություն։

Վահագն Մկրտչյանն ընդգծել է, որ թանգարանի ստեղծման նպատակն է առավել ճանաչելի դարձնել հայկական գինին, ընդգծել հայ գինեգործական ավանդույթների վաղեմությունն ու նոր սերնդին փոխանցել Հայաստանում դեռևս հնագույն ժամանակներից ձևավորված խաղողագործական հզոր մշակույթը։       


Անուն*
Ձեր էլ. հասցեն*
Ուղարկվող էլ. հասցեն*
 

Комментарии

нет комментариев

Написать комментарий

Комментарии может оставить только зарегистрированный пользователь.
Вам необходимо авторизоваться или зарегистрироваться
Неправильный логин/пароль
Почта
Пароль
 
Имя (обязательно)
Почта (обязательно)
Пароль (обязательно)
 

In Tour Expo 2018СТРОИТЕЛЬСТВО И ИНТЕРЬЕР 2018
Баннерная сеть СИП-ДБ©
«Բուկինիստ» ՍՊԸ
Որոնել նյութ ըստ ամսաթվի
  • Հայաստանի Արդյունաբերողների և Գործարարների (Գործատուների) Միություն
  • «Delta Beta» PR-գործակալություն