Մեկնարկել է «Ձեռներեցության աշխարհի գավաթ 2021» մրցույթի հայտագրումը

Հայաստանի ձեռներեցների համար մեկնարկել է «Ձեռներեցության աշխարհի գավաթ (EWC) 2021» մրցույթի հայտագրումը։ 

EWC միջազգային մրցույթը լայն հնարավորություններ է առաջարկում ձեռներեցներին՝ զարգացնելու իրենց գաղափարները, օգտվելու մրցույթի շրջանակում առաջարկվող մի շարք հնարավորություններից, միջազգային հարթակում ներկայացնելու իրենց ստարտափ գաղափարը։

Մրցույթի կազմակերպիչները հայտատուներին կաջակցեն գաղափարի  յուրաքանչյուր փուլում՝ գաղափարի փուլ (idea-stage), վաղ փուլ (early-stage), աճի փուլ (growth-stage)՝ տրամադրելով գործիքներ և ռեսուրսներ իրենց ստարտափը զարգացնելու համար:

EWC  2021-ի միջազգային եզրափակիչի մրցանակային ֆոնդը կազմում է 1 մլն ԱՄՆ դոլար, ինչպես նաև նախատեսվում է լրացուցիչ  ներդրումային հնարավորություններ և 750,000 ԱՄՆ դոլարին համարժեք ոչ դրամական օգնություն։

Մրցույթի EWC Accelerates բաղադրիչը ձեռներեցներին օգնելու վիրտուալ ուսուցման և մենթորական ծրագիր է։ Այն հնարավորություն է տալիս մասնակիցներին կատարելագործել իրենց հմտությունները, մեծացնել մրցույթի ազգային փուլում հաղթելու և միջազգային եզրափակիչում հայտնվելու հավանականությունը:

EWC առցանց հարթակում գրանցման փուլը հաջողությամբ հաղթահարած մասնակիցներին մրցույթի գործընկերների կողմից (Google Cloud, Hubspot, Stripe և այլն) տրամադրվում են ավելի քան 25,000 ԱՄՆ դոլարին համարժեք լրացուցիչ ծառայություններ։  

Ձեռներեցության աշխարհի գավաթ մրցույթի հայտերը բաց կլինեն մինչև հունիսի 6-ը։ 

Գրանցումն իրականացվում է հետևյալ հղումով՝  https://platform.entrepreneurshipworldcup.com/.../EWC+SignUp։ 

Ազգային եզրափակիչը տեղի կունենա 2021 թվականի հուլիս ամսին։ 

Ամբողջ աշխարհից լավագույն 100 ստարափները կուղևորվեն Սաուդյան Արաբիայի մայրաքաղաք Ռիադ՝ մասնակցելու EWC Accelerates ծրագրին և մրցելու արդեն EWC գլոբալ եզրափակիչում։  

«Ձեռներեցության աշխարհի գավաթ 2021» մրցույթի Հայաստանի ազգային կազմակերպիչն է Հայաստանի ամերիկյան համալսարանի Ձեռներեցության և նորարարական տեխնոլոգիաների կենտրոնը։ Մրցույթի համակազմակերպիչն է ՀՀ բարձր տեխնոլոգիական արդյունաբերության նախարարությունը։