Կստեղծվեն անձեռնմխելի կապիտալով ֆոնդեր. օրինագիծը քննարկվեց առաջին ընթերցմամբ

Արտակ Մանուկյանի, Ալեն Սիմոնյանի, Մխիթար Հայրապետյանի, Հովհաննես Հովհաննիսյանի, Համազասպ Դանիելյանի, Ծովինար Վարդանյանի հեղինակած «Անձեռնմխելի կապիտալով հիմնադրամների մասին» օրենքների նախագծերի փաթեթն առաջին ընթերցմամբ քննարկվեց ապրիլի 16-ի ԱԺ հերթական նիստում: Հիմնական զեկուցող Արտակ Մանուկյանը նշեց, որ օրենսդրական փաթեթի գաղափարը եղել է շատ վաղուց, ավելի տարածված է «Endowment Fund»-երի անվանումը: Նախագիծը շրջանառության մեջ է դրվել 9-ն ամիս առաջ եւ պատերազմով պայմանավորված` քննարկումը հետաձգվել է: Առաջին ընթերցումից հետո հարցի վերաբերյալ կկազմակերպվի քննարկում՝ շահագրգիռ անձանց մասնակցությամբ եւ կլինեն որոշակի փոփոխություններ:

«Այն այս վիճակով թերի է, դեռ պետք է քննարկել գաղափարը»,-ասաց Արտակ Մանուկյանը: Պատգամավորն ընդգծեց, որ թեեւ նախագծի անվանումը ենթադրում է անդրադառնալ անձեռնմխելի կապիտալով հիմնադրամներին, սակայն այն միայն հիմնադրամների մասին չէ. «Խոսքն ինստիտուցիոնալ փոփոխությունների մասին է, ոչ միայն հիմնադրամների, այլեւ հկ-ների»: Հիմնական զեկուցողը, շեշտելով, որ ուսումնասիրվել է միջազգային փորձը, հորդորեց բոլոր շահագիգիռ անձանց ներկայացնել առաջարկություններ, որպեսզի առավել որակյալ ներդրվի այս օրենսդրությունը՝ խուսափելով հատվածային լուծումներից:

Հարակից զեկույցում Արդարադատության նախարարի տեղակալ Վահե Դանիելյանը նշեց, որ «Endowment Fund»-երի ստեղծումն առաջադիմական գաղափար է, որի նպատակը որոշակի խնդիրների լուծումն է՝ սպորտի, գիտության, կրթության եւ այլ ոլորտներում: Ընդ որում, այդ ակտիվների համախումբը ենթակա չէ օտարման: Փոխնախարարն ընդգծեց, որ գաղափարին Կառավարությունը դեմ չէ, սակայն կան մի շարք դիտարկումներ, առաջարկներ, որոնք հեղինակների հետ պայմանավորվածության համաձայն կվերախմբագրվեն ու կշտկվեն հաջորդիվ: