Երևանում մեկնարկել է Հայ-թուրքական գործարար կոնֆերանսը

Այսօր Երեւանում մեկնարկել է Հայ-թուրքական 4-րդ գործարար կոնֆերանսը: Հայաստանի արդյունաբերողների եւ գործարարների (գործատուների) միության «Աջակցություն Հայաստան-Թուրքիա հարաբերությունների բարելավմանը» ծրագրի շրջանակներում կազմակերպված գործարար կոնֆերանսին մասնակցում են 50-ից ավելի թուրք գործարարներ: Համաժողովի ընթացքում խոսվելու է Հայաստան-Թուրքիա գործարար հարաբերությունների ներկա վիճակի, հեռանկարների եւ համագործակցության մասին:

«Այս կոնֆերանսին մասնակցում են Արեւելյան Անատոլիայի կամ Արեւմտյան Հայաստանի գործարարները, որոնց համար կենսական է հարեւան երկրի գործարարների հետ հարաբերությունների զարգացումը, նրանք են մեր զինվորները սահմանների բացման, հարաբերությունների բարելավման ծրագրում»,- ասել է Հայաստանի արդյունաբերողների եւ գործարարների (գործատուների) միության նախագահ Արսեն Ղազարյանը:

«Հույս ունենք, որ այս հանդիպումների ժամանակ առավել սերտ կուսումնասիրենք հայկական շուկան, կկարողանանք գտնել միջոցներ հայկական եւ թուրքական շուկաների միջեւ ապրանքափոխանակման պայմանների ստեղծման, հետագայում երկու երկրների առեւտրատնտեսական հարաբերությունները զարգացնելու համար»,- ասել է Վանի երիտասարդ գործարարների կազմակերպության նախագահ Քադրի Սալազը:

Արսեն Ղազարյանի փոխանցմամբ, Թուրքիայից Հայաստան ներմուծվող ապրանքների տարեկան շրջանառությունը տատանվում է $150 - 200 մլն սահմաններում, տարեկան $10-20 մլն-ի հայկական ապրանք է արտահանվում Թուրքիա' ոչ հայկական ծագման սերտիֆիկատով:

Աղբյուրը` www.mediamax.am

Լուսանկարը՝ www.mediamax.am