«Հայաստանը պետք է ինքնաբավ դառնա կաթնարտադրության ոլորտում»

ՀՀ գյուղատնտեսության նախարարությունն ու Հայաստանում ՄԱԿ-ի պարենային և գյուղատնտեսության կազմակերպությունն ապրիլի 4-ին ստորագրեցին «Անասնակերի մատակարարման բարելավում և կաթնամթերքի վերամշակման ընդլայնում Հայաստանի կաթնամթերքի ոլորտում» ծրագիրը:

ՀՀ գյուղատնտեսության նախարար Իգնատի Առաքելյանը նշեց, որ ծրագրով նախատեսվում է կատարել տարբեր ուսումնասիրություններ և վերլուծություններ, որի արդյունքում կկարողանանք մշակել ռազմավարություն՝ ինչպես զարգացնել Հայաստանում կերարտադրությունը, կաթնամթերքի մշակումը, անասնապահության ոլորտն ու անասնաբուժությունը։

Իբրև անհրաժեշտ քայլեր՝ նախարարն առանձնացրեց  կերերի ուսումնասիրությունը, որը կխթանի բնական ռեսուրսների կայուն օգտագործման առաջնահերթությունը, գյուղատնտեսական կենդանիների սննդի անվտանգության առաջնահերթությունը, կերերի ուսումնասիրության արդյունքներն, ըստ նախարարի, ազդեցություն կունենան պարենային անվտանգության, սննդամթերքի ինքնաբավության ապահովման հարցում։

Առաքելյանն ասաց, որ ծրագիրը նոր չի գործում, մասնագետները ներգրավվել են, սկսել են աշխատել, այսօր պարզապես ֆորմալացվում է։ Նրա խոսքով՝ ծրագիրով խնդիր է դրված՝ պարզելու՝ կերարտադրության ինչ հնարավորություն կա, ինչ գլխաքանակ կարող ենք ունենալ, արդյոք մեր արոտավայրերը, խոտհարքերը, կերարտադրությունը բավարար են, որ գնանք անասնապահության զարգացմանը, ինչպես կերակրել կենդանիներին՝ առավելագույն արտադրություն ստանալու համար։ Նախարարը նշեց՝ հնարավոր առավելագույն ցուցանիշը տարեկան 3,5- 4 հազար տոննա կաթ ստանալն է, մինչդեռ այսօր այդ ցուցանիշը 2000 տոննան է։

«Մեր,  որպես գյուղատնտեսության նախարարության, գերնպատակն է՝ առավելագույնս բարձրացնել մեր պարենային անվտանգությունը և ինքնաբավության մակարդակը, կարևոր նշանակություն ունի նաև պարենային անվտանգության հարցի լուծումը։ Մենք ունենք երկու տարբերակ՝ ավելացնել գլխաքանակ և ավելացնել արտադրություն կամ պակասեցնել գլխաքանակը, բայց պահպանել արտադրությունը։ Մենք կարող ենք ունենալ ինքնաբավություն՝ արտադրելով շատ կաթ, այս դեպքում այն կլինի մատչելի, կաթի փոշու ներմուծման կարիք չի լինի, եթե լինի կաթի ավելցուկ, ապա Հայաստանում կաթի փոշի արտադրելու հնարավորություն կլինի, ինչը նաև արտահանման հնարավորություն կտա»,- ասաց նա։

Հայաստանում ՄԱԿ-ի ՊԳԿ-ի ներկայացուցիչ Ռայմունդ Յելենը նշեց՝ այս ծրագիրը կարևոր քայլ է՝ աջակցելու գյուղատնտեսության զարգացմանը Հայաստանում, որովհետև կաթի արտադրությունը առաջնային գործոններից է։ Նրա խոսքով՝  2016-ին սպառվող կաթի գրեթե ութսուն տոկոսը արտադրվել է Հայաստանում, դա նշանակում է, որ զգալի  ծավալ կա՝ ավելացնելու։

Ըստ Յելենի՝ լրացուցիչ աջակցության ներդրումը կարևոր կլինի, քանի որ մինչ այժմ ոչ բավարար քանակությամբ կաթ է արտադրվում ոլորտում. «Եթե դա համեմատում եք, օրինակ, Ուկրաինայի և այլ երկրների ցուցանիշների հետ, պարզ է դառնում, որ զգալի աճի տեղ կա։ Տարբեր հաստատությունների կողմից ուսումնասիրություններ են արվել, այս ոլորտը մանրամասնորեն չի դիտարկվել»։

Հայաստանն, ըստ ՄԱԿ-ի ներկայացուցչի, լրացուցիչ ջանքեր պիտի գործադրի՝ իրավիճակը շտկելու համար, սակայն նաև կերարտադրության և վերամշակման ոլորտը պետք է զարգանա։ Նրա խոսքով՝ պետք է լրացուցիչ կարևորություն տալ գիտելիքներին, ենթակառուցվածքների հետ կապված խոչընդոտներին, մեքենատրակտորային համալիրին, պետք է վերլուծություն արվի հետագա քայլերի մասին։

www.panorama.am