Հայաստանում այս տարի օտարերկրյա ամենաշատ ներդրումը կատարել է Կանադան

Հայաստանի տնտեսության իրական հատվածում անցնող տարվա ինն ամիսներին 391 մլն դոլարի օտարերկրյա ներդրումներ են կատարվել: Այս մասին «Արմենպրես»-ի հետ զրույցում նշեց ՀՀ Էկոնոմիկայի նախարարության ներդրումային քաղաքականության վարչության պետ Վահագն Լալայանը: «Ազգային վիճակագրական ծառայության հրապարակած առաջին երեք եռամսյակի տվյալների համաձայն' Հայաստանում ուղղակի օտարերկրյա ներդրումները կազմել են 221 մլն դոլար»,-ասաց Լալայանը՝ շեշտելով, որ ամենաշատ ներդրումը կատարել է Կանադան ' մոտ 102 մլն դոլար, երկրորդ տեղում է Ռուսաստանը՝ մոտ 83 մլն դոլար, ապա' Շվեյցարիան՝ մոտ 39 մլն դոլար. այդ շարքում են բազմաթիվ այլ երկրներ:

«Եթե անդրադառնանք ոլորտներին, ապա ամենաշատ ներդրումները կատարվել են հանքային արդյունաբերության բնագավառում, երկրորդը հեռահաղորդակցության և կապի ոլորտն է և երրորդը՝ մշակող արդյունաբերության: Հասկանալի է, որ հանքագործության ոլորտում մեծ ներդրումներ են կատարել Կանադան, Շվեյցարիան՝ տարբեր հանքերի շահագործման համար, հեռահաղորդակցության մեջ՝ Ռուսաստանը, Ֆրանսիան, իսկ մշակող արդյուանբերության ոլորտում՝ տարբեր երկրներ: «Խմիչքների արտադրության ոլորտում առաջատարը Ֆրանսիան է, ցամաքային տրանսպորտի ոլորտում' «Հարավկովկասյան երկաթուղին», օդային հաղորդակցության' «Զվարթնոց» օդանավակայանի սեփականատերը»,- ընդգծեց ներդրումային քաղաքականության վարչության պետը:

Լալայանը շեշտեց, որ 2012թ.-ին օտարերկրյա ներդրումներով իրագործվել են մի շարք մեծ ծրագրեր, որոնց շրջանակներում շահագործման են հանձնվել տարբեր գործարաններ, մասնավորապես գինեգործության և թեթև արդյունաբերության ոլորտում: Խոսելով 2013թ.-ի ներդրումային քաղաքականության մասին՝ Վահագն Լալայանն ընդգծեց, որ Կառավարությունն ընդունել է արտահանմանն ուղղված արդյունաբերության ռազմավարությունը, որին համահունչ ձևավորվել է ներդրումային քաղաքականություն և ինչպես այս, այնպես էլ հաջորդ տարի իրենք շարժվելու են այդ ուղղությամբ:

«Ունենալով ընդունված ռազմավարությունը կարիք չկա ներդրումային քաղաքականությունն ամեն տարի փոփոխել, այն կրում է շարունակական բնույթ և կփոփոխվեր տնտեսությունում ինչ-որ ֆորսմաժորային իրավիճակների առկայության դեպքում, սակայն մենք նման իրավիճակում չենք հայտնվել: Հիմնական դերակատարությունը տնտեսության մեջ պայմաններ ստեղծելն է, որպեսզի բիզնեսը, այդ թվում նաև' օտարերկրյա, իրեն լավ զգա և կարողանա արդյուավետ աշխատել:

Այդ առումով 2012թ.-ը շատ հաջող էր Հայաստանի համար և ինչպես գիտեք Համաշխարհային բանկի «Doing Business 2013» զեկույցի ցուցանիշով Հայաստանը գտնվում է արևմտաեվրոպական երկրների կողքին' իրենից առաջ թողնելով Նիդեռլանդներին և շրջանցելով Բելգիային, Ֆրանսիային»,- ասաց Լալայանը՝հավելելով, որ կան մի շարք պետական ներդրումային ծրագրեր, ինչպես նաև ենթակառուցվածքային բնույթի, որոնք մեծ խթան կարող են հանդիսանալ, ինչպես ներդրումների, այնպես էլ տնտեսության զարգացման համար:

Աղբյուրը՝ armenpress.am