Մոնոպոլիստ են, եւ հարկեր քիչ են վճարում

ՀՀ պետեկամուտների կոմիտեի` առաջին 1000 հարկատուների եւ նրանց վճարած հարկերի մասին երեկ հրապարակած տեղեկանքից պարզ է դառնում, որ որքան աճում են մոնոպոլիստների եկամուտները, այնքան նվազում են նրանց վճարած հարկերը:

Մասնավորապես. այս տարվա առաջին կիսամյակում բանանի ներկրման մոնոպոլիա ունեցող «Քեթրին» ընկերությունը վճարել է 533 միլիոն դրամի հարկ այն դեպքում, երբ անցած տարվա նույն ժամանակահատվածում վճարել էր 849 միլիոն: Շաքարավազի եւ բազմաթիվ այլ ապրանքների շուկայում մոնոպոլիա ունեցող «Ալեքս գրիգ» ընկերությունը այս տարվա առաջին կիսամյակում վճարել է 8.6 մլրդ դրամ անցած տարվա 9.6 մլրդ դրամի դիմաց:

Խնդիրն այն է որ անցած տարվա համեմատ նշված ապրանքների միջազգային գները կտրուկ նվազել են, սակայն ներքին շուկայում դրանք թանկացել են, ինչը ուղղակիորեն ենթադրում է, որ վերը նշված ընկերությունների շահույթները շեշտակի աճել են: Այսինքն նրանք ավելի էժան գներով են ձեռք բերում այդ ապրանքները բայց ավելի թանկ վաճառում Հայաստանում:

Հիշեցնենք, որ «Քեթրինը» կապվում է ԴԱՀԿ ծառայության պետ Միհրան Պողոսյանի (Քեթրինի Միհրան) անվան հետ, իսկ «Ալեքս Գրիգը»` ԱԺ պատգամավոր Սամվել Ալեքսանյանի (Լֆիկ Սամոյի) հետ: Նրանք երկուսն էլ հերքում են իրենց կապը բիզնեսի հետ: Հավատում ենք անվերապահորեն:

armtimes.com