ՀՀ կառավարությունը ապրիլի 10-ին տեղի ունեցած նիստի ժամանակ մոտ 750 մլն դրամ է հատկացրել հողի հարկի գումարների և ոռոգման վճարների փոխհատուցման միջոցով ցրտահարությունից տուժած գյուղացիական տնտեսություններին աջակցելու համար։
Մարտի 30–ին տեղացած առատ ձյան, կարկուտի, ուժեղ քամու և օդի ջերմաստիճանի նվազման հետևանքով Հայաստանի գյուղատնտեսությանը լուրջ վնաս էր հասցվել։ Ցրտահարությունների պատճառով, որոշ տվյալներով, Հայաստանում տուժել է ծիրանի բերքի մոտ 80–90 տոկոսը։ Նախնական հաշվարկներով' միայն ծիրանենիներին հասցված վնասը կարող է հասնել 25 մլն դոլարի։
Ինչպես նշել է ՀՀ տարածքային փոխնախարար Վաչե Տերտերյանը, հողի հարկը կփոխհատուցվի ամբողջությամբ, իսկ ոռոգման ջրի վճարը' 50 տոկոսով։
Փոխվարչապետ, տարածքային կառավարման նախարարի պաշտոնակատար Արմեն Գևորգյանը հայտարարել է, որ մարզպետարանները պետք է շահառուների ցուցակ կազմեն և դրանք հրապարակեն իրենց կայքերում։
Նա հանձնարարել է Ջրային տնտեսության պետական կոմիտեին իր կայքում ևս տեղադրել բոլոր շահառուների ցուցակը։
ՀՀ աշխատանքի և սոցիալական հարցերի նախարարի պաշտոնակատար Արտեմ Ասատրյանն իր հերթին տեղեկացրել է, որ իր ղեկավարած գերատեսչությունը ցրտահարությունից տուժած գյուղացիների համար կիրականացնի նույն ծրագիրը, ինչ իրականացրել է նախորդ տարի Արմավիրի մարզում կարկտից տուժած գյուղացիների համար։
«Նախորդ տարի մենք 630 հազար ընտանիքի 120 մլն դրամ օգնություն ենք ցուցաբերել' փոխհատուցելով 4 հազար դրամի ամենօրյա աշխատավարձ։ Մենք նախատեսում ենք ցրտահարությունից տուժած գյուղացիական տնտեսություններին տրամադրել 150–200 մլն դրամի օգնություն», – ասել է Ասատրյանը։
Աղբյուրը՝ gov.am
| Անուն* | |
| Ձեր էլ. հասցեն* | |
| Ուղարկվող էլ. հասցեն* | |
Комментарии
нет комментариев
Написать комментарий
Комментарии может оставить только зарегистрированный пользователь.Вам необходимо авторизоваться или зарегистрироваться