Ռուսաստանը 2014 թ.–ին Հայաստանի արդյունաբերությանը որպես օգնություն կտրամադրի 700 հազար դոլար. ՌԴ ԱԳՆ

Ռուսաստանը 2014 թ.–ին Հայաստանի արդյունաբերության զարգացման համար կհատկացնի 700 հազար դոլար ՄԱԿ–ի արդյունաբերական զարգացման կազմակերպության միջոցով, նշվում է ՌԴ ԱԳՆ–ի կայքում հրապարակված հաղորդագրության մեջ։

«Հայաստանի Հանրապետության զարգացմանն աջակցություն ցուցաբերելու շրջանակներում ՌԴ կառավարությունը որոշում է ընդունել 2014 թ.–ին կամավոր ռուսական վճարների միջոցներից ՄԱԿ–ի արդյունաբերական զարգացման հիմնադրամին փոխանցել 700 հազար դոլար «Արդիականացման և շուկաների նկատմամբ հասանելիության ընդլայնման հաշվին Հայաստանի արդյունաբերության' արտահանմանն ուղղված բնագավառների մրցունակության բարձրացում» նախագծի իրականացման նպատակով», – նշվում է հաղորդագրության մեջ, հաղորդում է ՌԻԱ Նովոստին։

Ինչպես նշում է գերատեսչությունը, այս օգնությունը «հաստատում է Ռուսաստանի պատրաստակամությունը դաշնակցային գործընկերության շրջանակներում բարեկամ Հայաստանին տրամադրել անհրաժեշտ օգնություն կայուն սոցիալ–տնտեսական զարգացում ապահովելու նպատակով»։

Աղբյուրը՝ arka.am