Հայաստանը նախատեսում է 2014թ.–ին Բելառուսից 400 միավոր տրակտոր և պահեստամասեր ներկրել. Գյուղնախարարություն

Հայաստանը նախատեսում է 2014թ.–ին Բելառուսից 400 միավոր տրակտոր և պահեստամասեր ներկրել, դեկտեմբերի 20-ին ասուլիսի ժամանակ ասաց ՀՀ գյուղատնտեսության նախարարի առաջին տեղակալ Գրիշա Բաղյանը։

Միաժամանակ նա ավելացրեց, որ ընթացիկ տարում Բելառուսից Հայաստան է ներմուծվել 120 տրակտոր։

«2014թ.–ի մատակարարումների վերաբերյալ արդեն համապատասխան պայմանավորվածություններ կան երկու կողմի միջև»,– նշեց նա։

Բացի այդ, 2014թ.–ի առաջին կիսամյակում նախատեսվում է գյուղատնտեսական տեխնիկայի վերանորոգման և հավաքման երկու հայ–բելառուսական կենտրոն բացել Հայաստանում։

2013թ.–ի հունվարի 1–ի դրությամբ Հայաստանում տրակտորների պարկը կազմում էր 14 683 միավոր, կոմբայնների պարկը' 1362 միավոր։

Աղբյուրը՝ arka.am