Իսպանական հայտնի բրենդային հյուրանոցներն իրենց մասնաճյուղերը կունենան Հայաստանում

Իսպանական հայտնի բրենդային հյուրանոցների ցանցի երեք և չորսաստղանի հյուրանոցներ կլինեն Հայաստանում առաջիկայում, երեքշաբթի հայտարարեց էկոնոմիկայի փոխնախարար Արա Պետրոսյանը:

Ըստ նրա, նման պայմանավորվածություն է ձեռք բերվել ՄԱԿ-ի Համաշխարհային զբոսաշրջային կազմակերպության Եվրոպական տարածաշրջանային հանձնաժողովի ղեկավարության՝ հոկտեմբերի 18-19-ին Հայաստան կատարած այցի ընթացքում:

«Այդ Հանձնաժողովի ղեկավարի նախկինում աշխատել է Իսպանիայի զբոսաշրջության ոլորտում: Նա հանդիպել է հայաստանի վարչապետի հետ, և բանակցությունների արդյունքում պայմանավորվածություն է ձեռք բերվել, որ իսպանական հյուրանոցային բրենդերը ներդրումներ կկատարեն Հայաստանում»,- ասաց Պետրոսյանը:

Փոխնախարարը նշեց, որ ներկայում ակտիվ բանկցություններ են տարվում իսպանացի ներդրողների հետ, և մինչև տարեվերջ ծրագրված է իսպանական 4-5 հյուրանոցային ցանցերի ներկայացուցիչների այցը Հայաստան:

Նա նկատեց, որ, նոր հյուրանոցների կառուցման ոլորտում ներդրումների իրականացմանը զուգընթաց, իսպանացի գործընկերների հետ քննարկվում է նաև արդեն գոյություն ունեցող հայկական հյուրանոցների կառավարումը փոխանցելու հնարավորությունը:

Աղբյուրը՝ arka.am

Լուսանկարը՝ arka.am